Стабільны даход ад рэкламы на Twitch

Стрымінгавая платформа Twitch прадставіла праграму для забеспячэння стваральнікаў кантэнту мінімальным штомесячным стабільным даходам. Убудаваная функцыя «Менеджар рэкламы» набыла праграму фіксаваных выплат.

Цяпер стрымеры могуць праводзіць пэўную колькасць трансляцый з рэкламай і атрымліваць узамен фіксаваную аплату. Сэрвіс лічыць, што аўтаматычнае кіраванне рэкламай дапаможа стваральнікам кантэнту сканцэнтравацца на самім кантэнце, а пляцоўка возьме на сябе выплаты. Таксама спецыялісты паведамілі, што такі падыход дапаможа стрымерам планаваць будучыню і не баяцца спрабаваць новыя фарматы.

Функцыя даступная для партнёраў і кампаньёнаў Twitch. Карыстальнікі, якія ўваходзяць у гэты спіс, убачаць прапанову на панэлі кіравання ў менеджары рэкламы. Усяго даступна тры прапановы:

• 2 хвіліны рэкламы ў гадзіну і не менш за 40 гадзін стрымаў у месяц за 100 долараў;

• 3 хвіліны рэкламы ў гадзіну і не менш за 40 гадзін стрымаў у месяц за 300 долараў;

• 4 хвіліны рэкламы ў гадзіну і не менш за 40 гадзін стрымаў у месяц за 500 долараў.

Пры гэтым дадатковыя гадзіны трансляцый аплачваюцца асобна. «Як звычайна, чым больш вы стрыміце, тым больш зможаце зарабіць», – расказалі ў прэс-службе. Прадстаўнікі Twitch падкрэслілі, што на старце функцыя даступная не ўсім партнёрам сэрвісу, але не расказалі па якім прынцыпе адабралі ўдзельнікаў.